د اماراتو پښتانه د ملالې نوبېل امن جایزه لمانځي
نن په متحده عرب اماراتو کې د سولې نوبېل انعام ګټونکې ملالې یوسفزۍ په ویاړ جشن کېږي. د غونډې او جشن منتظم نظار یوسفزي مشال راډيو ته وویل، غونډه نن ماښام د عرب اماراتو پر وخت نهه بجې د شارجې په کلتوري مرکز کې کېږي چې پکې به په اماراتو کې د ټولو ادبي، خېر ښېګڼو او ولسي ټولنو غړي او هلته مېشت پښتانه برخه اخلي. یوسفزی زیاتوي، د غونډې او جشن موخه نړۍ ته دا پیغام ورکول دي چې پښتانه سوله ییز خلک دي. په دې غونډه کې به د ملالې یوسفزۍ د هلو ځلو په ویاړ مقالې او نظمونه اورول کېږي.