پنجشنبه 3 سپ 2015 سیمه ییزوخت 02:44

افغانستان

"طالبانو بندیخانه کې مې لاس وروست شو"



لښکرګاه (پژواک ٣٠ سلواغه ٩١): د پاکستان په کوټه ښار کې د طالبانو له خوا بندي شوى کس له يوې نيمې مياشتې وروسته راخوشى شوى، خو د ډېرو شکنجو له امله يې لاس پرې شوى دى.

دغه کس، چې د نادعلي ولسوالۍ د لوى باغ سيمې اوسېدونکى دى، نوراحمد نوميږي او ٢٦ کاله عمر لري، ده خپله کيسه پژواک خبرى اژانس ته په سلګيو راپيل کړه.

نوموړي، چې رنګ يې تور اوښتى و او په مخ کې يې وينه نه ښکارېده پژواک اژانس ته وويل، شاوخوا يوه نيمه مياشت وړاندې د معدې رنځ د درملنې په موخه د پاکستان کوټې ښار ته ولاړ او کله يې چې درمل واخيستل، په لومړۍ ورځ له افغاني طالبانو سره مخامخ شو.

د ده په خبره، دغه طالبان څلور تنه وو، خيرنې لنګوټې يې تړلې وې او ماته يې تر لږو خبرو وروسته وويل: ((دا چې ته د افغانستان يې او بيا د هلمند يې، نو د شپې تېرولو لپاره به له موږ سره مدرسې ته ولاړ شې؛ ځکه موږ هم د هلمند يو او ستا لپاره په بازار کې شپه تېرول ستونزمنه ده، ته شناختي کارت نه لرې او پوليس به دې ونيسي.))

نوراحمد وويل، چې همداسې يې وکړل، په کوټه کې د ځنګله نومي سيمې ته ورسره ولاړ، هلته يوې ديني مدرسې ته ورسېدل او له رسولو سره سم يې يوې چټلې تکاوۍ ته ښکته کړ، په کيڼ لاس کې يې غټ ځنځير ورته واچاوه او په دېواله پورې يې کلک وتاړه.

د هغه په وينا، طالبانو ورته ويل، چې پلار ته دې زنګ ووهه، کنه وبه وژل شې؛ ځکه ستا پلار د نادعلي د ولسوال سکرټر دى او په لوى باغ سيمه کې يې اربکيان هم جوړي کړي دي.

نوموړى زياتوي، چې د پلار د ټيلېفون شمېره ورسره نه وه، نو له دې امله يې همداسې له دېوال سره په ولاړې وتاړه او تر ١٤ ورځو يې ياديږي، چې د نشې ستنې يې ورکولې، نور په خپل حال نه و او له همدې امله يې لاس ورځ تر بلې خرابېده او وروسته يې غوښه او هډوکي سره جلا شول.

د طالبانو له بنده د راخوشي شوي کس په خبره، په دې موده کې يې له يوې خوا د لاس د خرابېدو او ورستېدو څخه بې حاله و او له بلې خوا خو يې کوټه دومره ناپاکه وه، چې دى او ورسره يو بل بندي، چې هغه هم د هلمند د موسى کلا اوسېدونکى و، ورږو او سپږو يې د بدن وينې زبېښلې.

نوراحمد وايي، چې د را خوشې کېدو تمه يې نه درلوده او په لومړيو ورځو کې يې مور او پنځه مياشتنى زوى جميل ډېر يادېده.

د هغه په وينا، څلور ورځې وړاندې پاکستاني پوليسو په ناڅاپي توګه پر دې مدرسه چاپه ووهله او دوى يې له بنده راخلاص کړل.

د شکنجه شوي کس په خبره، هغه طالبان د پوليسو د عملياتو پر مهال له سيمې تښتېدلي وو.
دى زياتوي: ((پوليسو او په ښار کې د اخترمحمد په نوم يو کس، چې افغان و او په کوټه ښار کې يې هوټل درلود، زما د پلار د ټيلېفون شمېره يې پيدا کړه او کوټې ته يې راوغوښت، چې د پلار په رارسېدو سره يې زه روغتون ته بوتلم او لاس يې تر مړونده لوړ رانه پرې کړ.))

د نوراحمد پلار مستري خدايداد پژواک اژانس ته وويل، چې زوى يې د درملنې په موخه پاکستان ته ولېږه، خو کله چې نادرکه شو، نو پاکستان او افغانستان کې يې ډېر ځايونه ورپسې وپلټل، خو درک يې نه و او يواځې يې د مرګ خبر ته ناست و.

د هغه په وينا، نوراحمد مستري و او درې کاله يې د کوکنارو د کمپاين د تراکترونو د جوړېدو کار کړى دى، نوره يې هېڅ ګناه نه درلوده او دى خپله د ولسوال په ملګرتيا سترګې نه پټوي، خواربکيان يې نه دي جوړ کړي او نه هم په دولت کې رسمي دنده لري.

نوموړي زياته کړه، د زوى په مرګ دومره نه خپه کېده، چې وژلى يې واى او مړى يې ورته لېږلى واى، خو په دغه ظلم، چې اوس ورسره شوى دى، هېڅکله به يې د غچ اخيستو فکر له سره ونه باسي.

دا هم ولولئ

Audio په تاریخي ډول ایا د پښتنو جرګې جمهوري وې او که څنګه؟

تاسې به د سوات ریاست له مثال سره واورئ چې په څه ډول وړې وړې جرګې وروسته په لویو جرګو او بیا د یوه نظام او ریاست په بنیاد کښېښودو کې بریالۍ شوې. تاسې به دا هم واورئ چې د پښتنو نورو سیمو جرګې ایا جمهوري وې او که نه؟ تفصیل...

Audio ایا د اسلام اباد پښتنو خامو کورونو ړنګول د ایین سرغړونه وه؟

دې خلکو ته حکومت دوه ورځې وخت ورکړ چې کورونه دې پرېږدي او بیا وروسته ورغلل او د خلکو کورونه یې ړنګ کړل. پر دې مهال د تاوتریخوالي په پېښو کې د هغې سیمې ګڼ اوسېدونکي ژوبل شول او ځېنې پولیسو ونیول او بیا یې ورباندې د ترهګرۍ مخنیوي مقدمې درج کړې. تفصیل...

Audio له سندرغاړي ګل نواز سره خبرې او د هغه سندرې

د ده په خبره، د هنګو اوسېدونکی دی او له هغه ځایه به پېښور ته ورته او له استاد شاه ولي سره شاګرد شو. په هغه وخت کې دی د اتم ټولګي زده کوونکی وو او سبق یې پرېښود. ګل نواز وايي، ده به له شاه ولي استاد سره درې، څلور میاشتې تېرولې او بیا به هنګو ته ولاړ. تفصیل...

Audio نومیالی انځورګر مراد وايي، لومړۍ استاده یې مور وه

مراد وايي، د مېنګورې دی او له وړوکتوبه یې له انځورګرۍ سره مینه لرله. لومړۍ استاده یې مور وه او تر هغې وروسته له نورو مصورانو سره شاګرد شو. بالاخره د اسلام اباد په هنرکدې کې د نومیالي هنرمند جمال شاه شاګرد شو. تفصیل...

فیس بک د مینې خورولو لپاره بهترینه وسیله

پښتانه ښکنځل نه خوښوي او نه یې هم په اسانه چاته کوي ، خو په دې وروستیو کې په ټولنیزو رسنیو لکه درواخلئ فیس بک کې داسې ویډیوګانې خپریږي چې ورکې د ډیورنډ د کرښې د دواړو غاړو یو شمیر پښتانه یو بل ته له ویډیو د لارې بد رد وايي او ښکنځل کوي. تفصیل...

مهم موضوعات