د هزاره ګانو پر وژنه عدالتي ګروېږنه

د پاکستان چیف جسټس افتخار محمد چوهدري په کوټه کې د هزاره توکمو په وژنه پخپله نوټس اخیستی  او په دې لړ کې یې نن د نهې پر ورځ یې لوی څارنوال( اټارني جنرل) او د بلوچستان ایډوکېټ جنرل عدالت ته غوښتي دي. 


په داسې حال کې چې د علي اباد سیمې د چاودنې قربانیان خاورو ته احتجاجاً نه سپارل کېږي، د بلوچستان حکومت له خوا په خپره شوې يوه خبرپاڼه کې ویل شوي چې  بېګا د  شپې ناوخته د پاکستان صدر اصف علي زرداري او وزیراعظم راجا پرویز اشرف د بلوچستان ګورنر ته ټيلي فون کړی، چې که په ښار کې د پوځ ضرورت وي، نو ور دې بولي. هلته بیا د وزیراعظم راجا پرویز اشرف په هدایت د پاکستان د اطلاعاتو د وزیر قمرزمان کایره په مشرۍ کې شپږ کسیزه پلاوی هم نن کوټې ته ځي، چې له احتجاج کوونکو سره خبري وکړي، او هغوی په دې قانع کړي، چې خپل مړي خاورو ته وسپاري. اهل تشیع له تیرو شاوخوا ۶۶ ساعتونو څخه له مړیو سره احتجاجاً ناست دي. او وايي؛ یخ وي، که باران، تر کومه چې يې غوښتنې منل شوې نه وي، نه به مړي خاورو ته وسپاري، او نه به هم احتجاج ختم کړي.


د بخښنې نړیوالې اداره (ایمنسټي انټرنېشنل) وايي پاکستاني چارواکو ته په کار دي چې د هزاره ټولنې د حفاظت لپاره لا نور ګامونه پورته کړي.

د علي اباد په چاودنه کې په لسګونو انسانان ووژل شوو، او هم په لسګونو کورنۍ خرابې شوې، خو د بلوچستان د کورنیو چارو سیکريټري اکبر حسین درانی وايي؛ استخباراتي ادارې يې ناکامه نه، بلکې کامیابه دي.

؛ که چېري يو کس د ترهګرۍ لس چاودنې کوي، په نهه کې ناکامه شي، او لسمه وکړي، نو دا يوه د هغه کامیابي نه ده. او نه هم حکومت ناکامي ده، چې په لس کې يوه وشوه. بلکې دا هغو ترهګرو ناکامي ده، چې په نهه و کې ناکامي شوو؛.

د اکبر حسین دراني په خبره هرکله چې پېښه وشي، نو وګړي همدا پوښتنه کوي، چې ولې وشوه. خو دده په وینا ددوي ادارو ډېری داسې پېښې ناکامه کړې دي. اکبر حسین دراني له خبریانو سره په خبرو کې وویل؛ ډېری رسنوال په خپلو رسنیو کې دا لیکي، چې دا اته سوه یا زر کیلوګرامه چاودېدونکې له کومه راغلل. د نوموړي په خبره دا چاودېدونکي توکي له يوې خوا هم راغلي نه دي، بلکې په همدې ښار کې جوړ شوي دي.

؛ دا چاودېدونکي توکي چې په ايي اي ډي کې کارول کېږي. په دې کې امونیم نايټرېټ، پوټاشیم پر میګنېټ، پوټاشیم سلفيټ او دغسې ډيری نور شیان استعمالېږي، چې هغه ټول زموږ په بازارونو کې په اساني سره ملاوېدای شي. اوس که ته دا شیان ته له مخالفو شیانو لکه بال بیرنګ، پيټرول يا ډيزلو سره ګډ کړې، نو ورڅخه چاودېدونکي توکي جوړولای شې؛.

د ویلو وړ ده چې د اهل تشیع په کوټه کې له مړيو سره د احتجاج دا دوم ځل دی، چې تردې وړاندې يې په جنورۍ میاشت کې ورته احتجاج کړی وو، چې په ترڅ کې يې د هغه وخت صوبايي حکومت ختم او په صوبه کې ګورنر راج ولګول شو. دا ځل بیا ددې احتجاج کوونکو غوښتنه ده، د علي اباد سیمې د چاودنې مسوولین دي ونیول شي، او په کوټه کې دي پوځ راوبلل شي.

بلخوا   د ملېشه ځواکونو چارواکو په کوټه کې رسنیو ته  ویلي پر قمبراني سړک  یې د عملیاتو نتیجه کې څلور مشکوک تره ګر وژلي دي.

د یادونې وړ ده چې د تیر خالي پر ورځ له شییعه مسلک سره تعلق لرونکو هزاره ګانو باندې بمي برید وشو چې په کې لږ تر لږه ۸۹ کسان وژل شوي دي اوخوا شا ۱۶۹ تنه ژوبل شوي دي.  د دې برید پړه لشکر جهنګوي وسله والې ډلې پر غاړه اخیستې ده.


د ویلو وړ ده چې د اهل تشیع په کوټه کې له مړيو سره د احتجاج دا دوم ځل دی، چې تردې وړاندې يې په جنورۍ میاشت کې ورته احتجاج کړی وو، چې په ترڅ کې يې د هغه وخت صوبايي حکومت ختم او په صوبه کې ګورنر راج ولګول شو. دا ځل بیا ددې احتجاج کوونکو غوښتنه ده، د علي اباد سیمې د چاودنې مسوولین دي ونیول شي، او په کوټه کې دي پوځ راوبلل شي.